Milli Məclisdə 2025-ci il büdcə zərfinin müzakirəsi zamanı deputatlar qadınların pensiya yaş həddinin aşağı salınmasını hökumət qarşısında qaldırıb.
Deputat Aydın Mirzəzadə:
“Qadınların yaş həddinin tədricən bir neçə yaş aşağı endirilməsi məsələsinə baxmasını hökumətə təklif edirəm”.
Deputat Ceyhun Məmmədov
“Gələcəkdə qadınların pensiya yaşlarına yenidən baxılmalıdır. Bu gün reallıq ondan ibarətdir ki, müəyyən bir yaşa gəldikdən sonra insanlar iş tapmaqda əziyyət çəkirlər. Cəmiyyətin bu məsələdən ən çox əziyyət çəkən üzvlərindən biri də qadınlardır. Bu məsələ ilə də bağlı bizə çoxlu müraciətlər var”.
Deputat Vüqar Bayramov
“Pensiya məbləğində keyfiyyət göstəricilərindən, məsələn, ailədə uşaqların sayı kimi indikatorlardan istifadə olunsun. Nəticədə çoxuşaqlı ailələr daha tez pensiyaya çıxmaq hüququ ilə yanaşı, daha yüksək pensiya almaq imkanı da qazanarlar”.
Deputat Əli Məsimli də qadınların pensiya yaş həddinin aşağı salınmasını hökumət qarşısında qaldırıb.
Spiker Sahibə Qafarovadan deputatlara irad: “Sizə qulaq asdıqca…”
“Sizə qulaq asdıqca adamı dəhşət bürüyür. Elə bil ki, ölkə bütün uçuruma gedir. Sosial sahə ilə bağlı kifayət qədər işlər görülür. Nəyə görə heç biriniz bu barədə danışmırsınız?! Yadınıza salın bütün işləri! Onları da qeyd edin. Nə üçün bu haqda danışmırsınız?”
Əmək və əhalinin sosial müdafiə naziri Sahil Babayev
Əgər pensiyanı böyük həcmdə artırsaq, o zaman pensiya sistemi çökər
Azərbaycanda pensiya sisteminə amnistiya tətbiq edilib və bunun nəticəsidir ki, 1 qəpik pensiya kapitalı olmayan şəxs pensiya ala bilir.
Əgər bu amnistiya tətbiq olunmasaydı, o zaman çox sayda insan pensiya ala bilməzdi.
Bu səbəbdən də pensiyanı böyük həcmdə artırmaq mümkün deyil. Əgər pensiyanı böyük həcmdə artırsaq, o zaman pensiya sistemi çökər.
Pensiyaların inflyasiyadan 3 dəfə artıq indeksasiyası aparılır. Bu, Azərbaycan hökumətinin ən mütərəqqi addımıdır. Pensiya sistemi sığorta sistemidir.