Nəcəfi-Əşrəf dini-elmi mərkəzindən çox vacib arxiv sənədi əldə etdim. Bunu alimlərimizin ictihad dərəcəsinə çatması barəsindəki bizə çatan yeganə sənəd hesab etmək olar. Çox sevindim.
Bizim keçmiş yerli alimlərimizin bir çoxu ictihad dərəcəsinə çatmışdılar, amma təəssüf ki, bunlar haqqında insanlar çox da xəbərdar deyillər, və yaxud axund sözünü eşidəndə indiki bəzilərilə ki, yazıb-oxumağa belə çətinlik çəkirlər, müqayisə edirlər.
Hal bu ki, mərhum şeyx Qəni (şeyx Əbdül-Qəni Badikubi) ictihad sahibi imiş, ictihadını isə dövrünün ən nüfuzlu müctehidlərindən sayılan Şeyxuş-Şəriə İsfahani imzalayıb, möhürləyib və təsdiqləmişdir. Buyurun, sənədin əsli və tərcüməsi:
Bismillahirrəhmanirrəhim.
Həmd-səna aləmlərin Rəbbinə və Onun ən fəzilətli salavat və salamı Peyqəmbərlərin əfzəli Muhəmmədə və onun pak ailəsinə olsun.
Belə ki, bu elminə əməl edən alim, fəzilətli, haqqı batildən ayıran, hər tərəfli kamala yetmiş, fəzilətlər və üstünlüklər sahibi, güclü istedada və doğru təbiətə (xasiyyətə) sahib olan,
yüksək dərk qabiliyyətli, dərin zəka sahibi, Allahdan qorxan təqva sahibi, daxilən təmiz şəxs, şübhə etdiyi halallardan belə çəkinən, pak Şeyx Əbdül-Qəni Badkubi (izzəti və ucalığı həmişəlik olsun) öz vətənini tərk edərək, məskənindən hicrət edib, öz torpağından və əqrabalarından ayrılaraq, qürbət əziyyətlərini öhdəsinə götürüb Rəsulullahın elminin qapısının (İmam Əlinin) yanında qərar tutaraq alim və fəzilət sahiblərinin mənəvi nəfəsi ilə, onun (İmam Əlinin) civarının (qonşuluğunun) bərəkətlərindən mədəd alan şəxslərdəndir.
O, mənim yanımda uzun illər bir çox elmi bəhslərdə cid-cəhdlə zəhmət çəkmiş, çalışmış (ictihad etmiş) və dinin əsli və fər`i sahələrinin dərinliyinə xəbərdar olaraq, nəzəri sahələrin dərinliyini dərk etməyə nail olmuşdur. Qoy (insanlar) onun varlığının bərəkətlərini, hüzurunun yetirdiyi bəhrələri dərk etsinlər və bunlara şahidlik etsinlər.
O bu zəifin (özünü nəzərdə tutur-tər.) tərəfindən şəriət hakiminin iznilə bağlı olan sahələrdə (təsərrüf etməyə) icazəlidir, bu şərtlə ki, (doğru) yoldan kənara çıxmaqdan insanı qoruyan ehtiyata əməl etsin. Ona ehtiyata sarılmağı və ehtiyat olan yerlərdə durmağı tövsiyə edirəm. Ondan sağlığımda və mən öldükdən sonra öz saleh dualarında məni unutmamağı təmənna edirəm.
Qələmə aldı: Şeyxuş-şəriət olaraq məşhur olan günahkar bəndə, Fəthullah əl-Ğərəvi əl-İsfəhani, (Allah onun çirkin günahlarını bağışlasın)
Cəmadil axir ayı 1330 hicri.
Seyyid Mirhəmid, məscid axundu