Filmdə deyildiyi kimi, ölü gələr, diri gedər. Harada? Yox, hamam deyil. Deyəcəyəm…
Həyəcanlandım, dərs otağına yenicə daxil olmuşdum, elə bildim ki, həyəcanımı atmaq, inkişaf etmək üçün gəldiyim yerdə ilk dəqiqələrdən auditoriyanın önünə çıxacağam. Həyəcanımın səbəbi səhnədə qoyulan stul idi. Yanılmışdım…
Nələr oldu, nələr?
2 ay ərzində sanki bağçadan başlayıb doktoranturada yekunlaşdıq. Danışmaqla, ümumiyyətlə, arası olmayandan, səsi çıxmayandan tutmuş, yaxşı danışıb da, korrektələrə ehtiyacı olana qədər. Elə bilirəm ki, hamının şəxsi inkişafında xeyli dəyişiklik oldu. Obrazlı desək, lal körpələr idik, dil açdıq, hissiyatsız idik və ya az emosional idik, formaya düşdük.
Söhbət “Karnegi Klub”dan və bizim əziz ustadımız Nəcəf müəllimdən gedir. Əminəm ki, öyrəndiklərimiz bizə elə üstünlüklər və fürsətlər verəcək ki, təlimdə boxçamıza yığdığımız ləl-cəvahirat bizi sürətlə irəliyə aparacaq.
Yorğun gəlib gümrah çıxdıq.
Roldan-rola girdik, əsəbi, emosional, laqeyd obrazları canlandırdıq, həyəcanımızı idarə etməyin texnikalarını öyrəndik və 50 nəfərin qarşısında özümüzü sınağa çəkdik. Əvvəlcə həyəcandan əsdik, sonra ürəklənib kükrədik. “Adə, bir az diri oynayın da” şüarı altında dirildik. Hətta göz yaşı tökənlər, burnunu çəkənlər oldu. Dərsin bir hissəsi idi. Bu dəfə rola girmədən belə hissləri yaşadıq.
Dostlar qazandıq, and içdik
Müxtəlif, rəngarəng sferalardan və yaş qrupundan tələbələrlə xoş ünsiyyət yaşadıq, bu bizi daha da ruhlandırırdı. Dərslərimizə məsuliyyətli yanaşmağımıza da təkan verirdi. Spikerlər də seçildi, seçildi ki, bu sevimli ortamı uzunömürlü etsin, yenidən bir yerə toplaşa bilək, öyrəndiklərimizi təravətli saxlaya bilək… And içməyə gəldikdə isə bunu tam dilə gətirməsək də, niyyətimizi belə qoyduq – ayrılmayaq, ayrı düşməyək.
Nəcəf müəllim – Dr. Nəcəf Allahverdiyev
Bir çoxları sosial mediadan tanıyır, ən çox 40 gün yalnız su içməyi ilə, yəni su orucu ilə yadda qalıb.
Amma biz xoşbəxtik ki, Nəcəf müəllimi yaxından tanıdıq və tələbəsi olduq. Onun dərsləri təkcə quru dərsdən ibarət deyildi, özü demişkən, nəvələri var, amma 21 yaşındadır. Xəyallarda olan valideyn obrazında övladlarına sevgisini göstərdi. Nə xoşbəxtlik yaşadıq bilirsinizmi? Gərək dərslərə qoşulasınız ki, o zövqü alasınız. Qətiyyən reklam etmirəm, sizə xoşbəxtliyi, zövqü, istirahət edərək yüksəlməyi tövsiyə edirəm. Həyatınız “Nəcəf müəllimə qədər və Nəcəf müəllimdən sonra” mərhələsinə bölünəcək.
Yaradana təşəkkür edirəm ki, Nəcəf müəllim kimi insan yaradıb və bizə onun tələbəsi olmağa fürsət verib.
İnanın ki, az yazmışam, bir yüksəliş iksirinin (sehrli qarışım) dadını yazı ilə nə qədər ifadə edə bilərəm ki? Gərək yaşayasınız, zövq alasınız…
Karnegi Klub | Təlim Mərkəzi və Dr. Nəcəf Allahverdiyevlə olan xatirəmizdən…
Hörmətlə jurnalist Samir Mirzə