Azərbaycan Animasiya Assosiasiyası sosial media hesabında rəssamı Elçin Hami Axundov olan “Cırtdan-pəhləvan” (1981) filminin səhnə təsvirini (raskadrovka) paylaşıb.
Paylaşımda “Azərbaycan animasiyası” kitabına istinadən çex rejissor-animator Karolina Çijkovanın sözlərindən sitat gətirilib.
“Rəsmli cizgi filmlərindən yaxşı tanıdığımız çex Krteçek (Köstəbək) obrazı tipik nümunədir. Onun təsviri ilkin kitab illüstrasiyaları ilə asanlıqla müqayisə olunur. Bu illüstrasiyalara illər keçdikcə əlavələr edilir, lakin dəyişməz təsviri yanaşma saxlanılır. Belə ki, Krtek çex cizgi filminin, daha dəqiqi isə bütün çex animasiya filminin ikonasına çevrilir. Lakin bir neçə il öncə, müəllifin, Zdenyek Millerin ölümündən sonra, bu personajın müəllif hüquqlarının bir hissəsi başqa şəxsin əlinə keçir. Çox keçməmiş Krtek 3D rəqəmsal formatına salınır. Bu təsvirin ilkin forma ilə uyğunluğu minimuma enir və birdən ekranda süni bir obraz görürsünüz, bu obraz sizə uşaqlığınızdan bulanıq, tam aydın olmayan birini xatırladır. Buna görə də müasir texnoloji imkanlara baxmayaraq, Cırtdanın rəsmli, müstəvi formasında qalması fikrinin tərəfdarıyam. Şübhəsiz bəzi çex personajları çex xalqı üçün mədəni irs hesab olunduğu kimi, Azərbaycan cəmiyyəti üçün də Cırtdan personajı bu xalqın folklorunun mühüm parçasıdır. Buna görə də Azərbaycan mədəniyyətinin bu və ya digər fantastik əsərləri ilə daha məsuliyyətli və həssas davranılmalıdır.
Azərbaycan animasiya yaradıcılığının son illər bir qədər durğunluq dövrü keçirməsinə və digər ölkələrlə müqayisədə inkişafının çox aramla getməsinə baxmayaraq, əminəm ki, 70 və 80-ci illərin irsindən, keyfiyyətindən qaynaqlanmaq və Azərbaycan animasiyası üçün özünəməxsus, xarakterik bir üslub yaratmaq olar. Ümidvaram, növbəti illər ərzində gənc animator və rəssamlar nəsli bunun üçün əllərindən gələni əsirgəməyəcək, Azərbaycan cizgi filmi yaradıcılığına yeni nəfəs verəcək və bu yaradıcılığın digər xalqların yaradıcılıqlarının kölgəsində qalmasına imkan yaratmayacaq”.
